KAMA KIJANA HURU.

Kama kijana huru ninashukuru
Mungu kwa kuzaliwa kipindi uhuru umeshaingia
Kwa kulikuta taifa limeshazaliwa
Kwa kuikuta amani imeshajengeka
Kama kijana huru ninashukuru
Mashujaa walioipigania na kutetea uhuru
Viongozi, wanajeshi na wananchi waliojitoa kila siku
Wakayaona mauti na bado wakazidi kuchonga mikuki
Wakapigwa mijeledi na bado wakashika bunduki
Kama kijana huru ninashukuru
Waliotangulia kabla yetu kwa jasho na damu
Walilomwaga kukataa ukoloni wakavikwa utumwa
Wakashuhudia watoto wao wakivuliwa utu na kupigwa mitama
Kama kijana huru ninashukuru
Mungu kuzaliwa kipindi cha uhuru.

Kama kijana huru ninajukumu
La kuthamini utu na maisha ya mtanzania mwenzangu
La kuendeleza hekima na busara za waliopita kabla yangu
Waliojua maana ya uzalendo na
Wakajenga nchi kwa vitendo
Kama kijana huru ninajukumu
La kutetea haki za msingi za mtanzania mwenzangu
La kuhakikisha demokrasia ya maneno inaangamizwa kwa nguvu
Na vijana wa kitanzania wanaacha uvivu
Kama kijana huru ninajukumu
La kupambana na maadui wa maendeleo ya mtanzania
Ikiwemo ufisadi, rushwa, ubaguzi na imani za kishirikina
La kuelimisha jamii na kuifungua macho
Kua maana ya kua huru ni kuthamini na kuendeleza kidogo ulichonacho
Kua ujinga na kupuuzia uovu ndio chanzo cha machafuko
Kama kijana huru ninajukumu
La kuendeleza amani, upendo na uhuru.

Kama kijana huru ninahaki
Ya kujua ukweli na sio kuwekwa gizani
Ya kupata vizuri bila kupimwa mizani
Ya kupinga uonevu hasa kwa wanyonge na masikini
Ya kudai uhuru wangu, na mchango wangu kuuthamini
Kama kijana huru ninahaki
Ya kutimiziwa haki zangu za msingi;
Elimu bora, afya bora, usalama wa maisha na mali
Ila yasikitisha kuona zinazidi kudorora hali
Huduma mbovu, mishahara midogo na elimu ya dafutari
Kama kijana huru ninahaki
Ya kujua miaka 53 ya uhuruImenipa nini
Na kutambua kwa miaka 53Ninajivunia kitu gani.

©Zuhura Seng'enge 
  09/12/2014.

(Please share, leave a comment)

UNAFURAHIA KUA MTANZANIA HURU?

Tanganyika huru,

Ndilo lilikua lengo kuu la baba wa taifa

Tanganyika shujaa,

Ndio uliokua msimamo mkuu wa baba wa taifa

Tanganyika endelevu,

Ndio iliokua jitihada kuu ya baba wa taifa

Na ujinga, maradhi, umasikini

Ndio yaliyokuamapambano makuu ya baba wa taifa.

Ni miaka 53 tangu uhuru utangazwe Tanganyika
Mwalimu alijitoa kuhakikisha tunasonga mbele watanganyika
Katika kipindi cha uhai wake alisisitiza sana juu ya upendo na umoja
Akijua Ipo siku yeye na sisi hatutokua tena pamoja
Tukaapa kuyafuata mafundisho aliyotuasa
Tukaahidi kutekeleza maagizo aliyoyaacha
Kwa machozi tena ya kwikwi, tukimkufuru hadi na Mungu

Tukatoa vyetu viapo, 'Tanganyika shujaa, Tanganyika huru'

Na tukasema kwa kishindo, 'Mtanganyika kabla ya mzungu'

Wanafiki!!

Tulijipamba kwa tabia nzuri mbele ya macho ya watu
Tukafuata kama kondoo wema kumbe asili yetu ni chatu
Ahadi nyingi tukazitoa na mipango lukuki lukuki
Watanzania bila kujua wakaukumbatia mkuki
Tukawa sababu ya taabu na dhiki
Tukajenga kati yetu chuki
Ujinga, maradhi, umasikini, vikatawala jamii zetu
Na sasa vimezaa watoto, wanaotawala maisha yetu;
Siasa chafu, ufisadi, rushwa, ujambazi, uvivu, unyanyasaji
Udini na ukabila, imani za kishirikina, ukatili na mauaji
Ndizo zimekua wimbo wa taifa
Nasi tumekaa tukitazama watoto wetu wakiangamia
Maradhi haya yakijenga donda ndugu katika nafisi zetu
Katika maisha yetu.

Tanzania huru, Tanzania shujaa, Tanzania endelevu
Lengo la mwalimu
Leo miaka 53 maadhimisho ya siku yetu
Tunajivunia kitu gani katika kua huru?
Zaidi ya kuongeza na kudai ushuru
Zaidi ya kutia giza kwenye nuru
Maendeleo? Ndio yapo kadhaa
Je yana thamani gani kama bado tunakufa na njaa?
Je yana thamani gani kama utu, upendo, umoja na ukweli ndio yetu karaha?

Tafakari, chukua hatua.
Hongera kwa kuiona miaka 53 ya uhuru Tanzania bara.

©Zuhura Seng'enge.
  09/12/2014.

(Please share, leave a comment)